كيفاش تقوي في التركيز متاعك وقت القراية

التركيز من أهم الحاجات الي تعاونك وقت القراية .حاجة مهمّة برشة، خاصة كيف تبدأ تحضّر لامتحانات ولا تقرا في ماتيارات صعاب و تستحق تكسير راس . في المقال هذا، باش نعطيك شوية نصايح وطرق باش تعاونك تزيد في التركيز وتقلل من التشتّت

حضّر روحك قبل ما تبدا

أول حاجة لازم تعملها إنك تحضّر الجو قبل ما تبدا تقرا. البيرو لازم يكون نظيف ومنظّم،دبوزة ماء بحذاك وكل حاجة تستحقها لازم تكون قدامك، باش ما تقومش كل شوية وتلهي روحك

التليفون، يا تحطّو بعيد يا تعطيه لشكون ولا حطو مود اڢيون، خاطر أكثر سبب للتشتّت هو النوتيفيكاسيونات والسكّرولينغ الي ما يوفّاش. وقت تحضر كل شيء و تدخل في المود التركيز يجي وحدو

طريقة بومودورو

طريقة بومودورو، وهي تقنية تقسم الوقت لـ 25 دقيقة قراية، و5 دقايق راحة. تعاود هكا 4 دورات، وبعد تاخو بريك طويل شوية. الطريقة هاذي تعلّمك كيفاش تخدم بنظام، وتبعد على التعب الذهني اللي يخلّي الواحد ما يركّزش

النوم و الراحة

التركيز ما يجيش كان وقت القراية، بل يبدا من حياتك اليومية. النوم الكافي يلعب دور كبير، إذا ما ترتحش مليح، مخك باش يكون تاعب وما يركّزش. ووقت الراحة، ما تبقاش شادد التليفون، قوم بدّل الجو، أخرج شوية، ولا حتى أغسل وجهك. المخ متاعنا كيما أي عضلة في الجسم، وقت يتعب، ما ينجمش يعطي الأداء اللي نحبو عليه. وقت ما ترقدش بالباهي، مخك بالسيف يخدم ، الذاكرة تضعف، وسرعة الفهم تنقص. تلقى روحك تقرا في نفس السطر عشر مرات وماتستوعب حتى كلمة
وقت ترقد بالباهي ، المخ يعمل حاجة اسمها “ترتيب للمعلومات”، يعني الحاجات اللي قريتهم ولا عشتهم في النهار، المخ يفرزهم ويخزّنهم وقت النوم. هذا يفسّر علاش القراية قبل النوم تنفع، وساعات تلقى روحك تتفكر حاجات ما كنتش مركز فيها وهذا خاطرك قريتها قبل ما ترقد

قلّة النوم تعمل زادة توتّر وقلق، وهذا بحد ذاتو يضّعِف التركيز. تلقى روحك تتنرفز على أقل حاجة، وكل ما تحاول تركّ مخك يهرب عليك. أمّا، وقت ترقد بالباهي، النفسية تكون مرتاحة، والمخ يكون في أحسن حالاتو

إسمع وانتي تقرى

مش الطلبة كل ينجمو يركزو وهوما يسمعو في حاجة أما برشا يدخلو في المود و تركيزهم يزيد بالجاز ولا لوفاي ولا حتى أصوات الطبيعة كيما النار وصوت العصافر، صوت المطر، البحر، ولا رياح خفيفة،إلي تعاون على تهدئة المخ وتخليه يركّز بطريقة مريحة. الأصوات هاذي تنقص من التوتر، وتبعث طاقة إيجابية تخليك ترتاح وتخدم مغير تشتت

زادة فما نوع من الأصوات يسمّى “وايت نويز” (الصوت الأبيض)، وهو صوت ثابت، كيما صوت المروحة ولا الراديو خ الموجة. الصوت هذا يخلي مخك يركّز على حاجة وحدة. برشا ناس يستعملوه باش يقروا ولا حتى يرقدو

أما إذا تحب حاجة فيها شوية لحن، تنجم تسمع لوفاي ميوسيچ، اللي هي موسيقى هادئة، بلا كلمات، وإيقاعها خفيف. الموسيقى هاذي مش باش تلهيك، بل بالعكس، تعاونك تدخل في التركيز العميق

أكيد، مش الأصوات الكل تنفع لكل شخص. لازم تجرّب وتكتشف شنوا اللي يناسبك. فما ناس تحب تقرا بصوت مطر، وفما ناس تلقى راحتها في موسيقى كلاسيكية

وما تنساش، الصوت لازم يكون خفيف، ما يغطيش على تفكيرك و كان باش تسمع غناء الأحسن إنو يكون مغير ليركس وكلام. ما تقويش الصوت برشا، باش ما توليش تسمع للموسيقى بدل ما تركّز على القراية