كيفاش تعمل صحاب في الفاك

الفاك تجربة جديدة، عالم آخر فيه برشا وجوه ما تعرفهمش. اول العام بش تحس روحك وحدك، أما الحقيقة برشا عباد كيفك يحبو يكونو صداقات جديدة. الفاك مش كان قراية، هي زادة فرصة باش تتعرف على عباد جدد وتكوّن صداقات. كيفاش تنجم تعمل صحاب في الفاك؟

كون انت

ما تبدلش من روحك باش ترضي العباد. كون طبيعي و لصحاب تو يجيو وحدهم. نحي من مخك المخاوف: كيفاش باش نلقا صحاب؟ هل الناس باش تقبلني؟ تصرف على طبيعتك مش لازم تكون شخص آخر باش تتقبل في وسط معين، خاطر الصداقة الصحيحة تبدأ وقت الناس تعجبها شخصيتك الحقيقية، موش الشخصية اللي تحاول تلبسها. وقت تكون طبيعي، الناس اللي عندهم نفس الاهتمامات باش ينجذبوا ليك وحدهم

امدح و قول كلام باهي

شكون منا ميحبش يسمع كلمة باهية و لا يحس بلي هو مزيان و لا يعرف يلبس ولا ريحتو باهية .ديما سمع العباد شنوا يحبو يسمعو .خليهم يحسو بالتقدير. اسهل و ابسط حاجة انك تقولهم صباح خير كل يوم ،وقتها يحفظو وجهك و يعرفو لي انت انسان باهي .و لا احسن حاجة انك تمدحو ؛ محلاه مريولك منين خذيتو ؟ بارفان متاعك بنينة شسمها ؟خطك مزيان منقالتك مزيانة

نحي التاليفون كي تبدا مع لعباد

كيفاش تحب تعمل اصحاب و انت تسكرولي في التيك توك ولا تحكي مع شكون في المسنجر .كي تبدا بحذا الجماعة لي يقراو معاك نحي الاير بودز و خوذ كلمة و اعطي كلمة .حاول انك تدخل في الحوار مغير متقص على لعباد و الا تفرض رايك .و كي يطلبك حد اعتذر منهم ابعد عليهم احكي في التاليفون بعد ارجعلهم. خليهم يفهمو لي انت مركز مع حديثهم و متنساش تضحك على النكت حتى بالكذب ميسالش ساعات لازمك تنافق

عامل الناس كيما تحبهم يعاملوك

القاعدة الذهبية في تكوين الصداقات: عامل الناس كيما تحبهم يعاملوك! إذا كنت شخص إيجابي، محترم، متعاون، وعندك شوية ضمار، أكيد الناس تحب تكون صحاب معاك. متحكمش على الناس من أول نظرة ,عاون غيرك وقت يطلب منك و اسمع بالباهي كي يحكي معاك شكون

اعرف شكون تخالط

صحيح انو وقت يكون عندك صحاب حاجة باهية، أما ملازمكش تاثق في الناس فيسع. خوذ وقتك باش تفهم الناس اللي تحب ترجع صحاب معاهم، وشوف كيفاش يتصرفوا في مواقف مختلفة

الخلطة بلطة والجرب يعدي

مثل تونسي